Школага өөренип тургаш-ла шүлүк бижиирин шенеп эгелей берген мен. Ачам ону эскерип кааш сонуургап, номчуп, сүме берип база эки деткип чораан. Баштайгы ийи-үш шүлүктерим «Хемчиктиң сылдызы» деп солунга 1983 – 1984 чылда үнгүлээн. Ынчалза-даа мен аргалыг болза бодумнуң чогаадылгага оралдажыышкыннарымны улустан чажырар, оларны дыка үр орта херекке албас турганым шын. Чүгле университетке өөренип турумда, 1987-1991 чылдарда «Тываның аныяктарынга» база «Улуг-Хем» деп чогаал сеткүүлүнге кезек шүлүктерим үнгеннер. Ол үеде меңээ шүлүктерим сонуургаан аныяктардан чагаалар кээп туруп бээрге, арай ыядып, шыны-биле чугаалаарга бичии корга-даа берген ышкаш мен. Оон бээр шүлүк бижиири мээң чажыдым апарган. Үе, чылдар чүнү-даа өскертиптер. Ынчангаш ам ол чалыы үемниң шүлүктерин ачамның чагаан аайы-биле чонумга, тыва улузумга көргүзейн.